Pas akuzave të Partisë Demokratike, Prokuroria e Përgjithshme ka kërkuar verifikimin e shenjave të gishtërinjve të Agim Kajmakut, kryetarit të Bashkisë Vorë.
Lidhur me këto akuza ka reaguar përsëri Kajmaku i cili shprehet se i qëndron deklaratës që ka bërë më herët, dhe se kurrë nuk është përfshirë në veprimtari kriminale.
Në reagimin e tij, kryebashkiaku i Vorës, deklaron se në Shqipëri dhe Greqi ka punuar për të nxjerrë bukën e gojës, ndërsa emrin e ka ndryshuar për shkak të dokumenteve për të qëndruar në Greqi.
Ai e mbyll reagimin e tij duke thënë se; “Unë dua të siguroj qytetarët e Vorës se pavarësisht kësaj poshtërsie, jam dhe do të jem në çdo moment në krye të detyrës! Ju më besuat në 30 qershor për t’i ndryshuar faqen Vorës sonë dhe për t’a vënë bashkinë në shërbim të qytetarëve.”
Reagimi i Agim Kajmakut
Që pas marrjes së detyrës si kryetar i Bashkisë së Vorës, ata s’u përballen nga frika e humbjes së padiskutueshme, më janë vërsulur me tërbim!
Por unë siguroj me bindje, në radhë të parë qytetarët e Vorës se i qëndroj pikë për pikë asaj që kam deklaruar edhe më herët lidhur për këtë sulm.
Unë nuk jam marrë kurrë me trafiqe dhe krime. Kam qenë dhe jam punëtor e familjar. Kam punuar për të nxjerrë bukën e gojës në Shqipëri e në emigracion dhe emrin e kam ndryshuar si të gjithë shqiptarët, që të më jepej mundësia të rrija atje dhe punoja.
Partia Demokratike po merret me limona dhe me mandarina emigrantësh shqiptarë, të cilët halli i ka shtyrë të punojnë në një vend të huaj! Ata bëjnë sikur nuk e dijnë se çfarë kanë hequr shqiptarët për të mbijetuar me emra e me mbiemra nga më të ndryshmit në Greqi.
Në fakt PD është limoni i shtrydhur që s’i duhet më asnjeriu. Le ta thonë autoritetet fjalën e tyre dhe të na falin qytetarët për këtë shqetësim!
Unë dua të siguroj qytetarët e Vorës se pavarësisht kësaj poshtërsie, jam dhe do të jem në çdo moment në krye të detyrës! Ju më besuat në 30 qershor për t’i ndryshuar faqen Vorës sonë dhe për t’a vënë bashkinë në shërbim të qytetarëve./ Opinion.al E.Xh.
