Replikat midis përfaqësuesve të presidencës dhe mazhorancës janë zhvendosur në Facebook. Pasi presidenti ktheu brenda 24 orëve dy ligje për rishqyrtim në Kuvend, reagimet erdhën si fillim nga kryetari grupit parlamentar Taulant Balla ditën e djeshme, ndërsa sot nga Ministrja për marrëdhëniet me Kuvendin Elisa Spiropali.
Kjo e fundit ironizoi vendimet e presidentit duke i quajtur sulme ndaj mazhorancës dhe duke e thirrur atë “Baba Xhike”. Reagimi në lidhje me këto deklarata ka ardhur menjëherë nga presidenca.
“E çmendura E., foli sot për shumë gjëra, por në asnjë rresht për thelbin e problemit: nenet e dyshimta klienteliste 17 dhe 18 të ligjit famoz të PPP-ve, që në muajt e verës i krijojnë hapësirë pakicës që nuk do rotacion, të sulet drejt pronave publike për të zhvatur ç’të mundë deri në vjeshtë.
Dhimbje për të çmendurën E., cila pasi nxorri me këpucë të kuqe doganat, nuk i bën përshtypje t’i nxjerrë dritat e kuqe të gjithë ekonomisë kombëtare, pavarësisht paralajmërimeve të institucioneve ndërkombëtare” shkruan në Facebook, zëdhënësi i presidentit, Tedi Blushi.
Replikat midis palëve deri tani kanë qenë të forta por ende nuk ka asnjë përgjigje konkrete mbi kritikat që Presidentit parashtroi për nenet 3,6,7 dhe 11 të ligjit 44/2019 dhe për nenet 17 dhe 18 të ligjit 50/2019. /Opinion.al
