Ish-deputetë të PD, si edhe kreu i kësaj partie Lulzim Basha iu bashkuan paraditen e sotme grupit të artistëve dhe aktivisteve që protestojnë kundër shembjes së Teatrit.
Basha e quajti këtë një skemë mafioze, ndërsa tha se do të jenë në mbështetje të artistëve.
“Ky është një projekt grabitje, një projekt kriminal. Kjo ka qëllim grabitjen e kësaj toke, me një arkitekt të dënuar në Itali. Është një skemë e pastër mafioze për të pasuruar Ramën dhe një grusht hajdutësh për të pastruar paratë e drogës. Teatrin e kanë mbrojtur artistët dhe aleanca. Ne do të jemi në mbështetje të tyre. Çdo përpjekje për të hapur gropë te Teatri do të kthehet në gropën e Edi Ramës. Më në fund, duket qartë se nuk kemi një qeveri, por kemi një bandë. Kjo që po ndodh këtu do të ndodhë edhe në shtëpitë e shqiptarëve. Ta zhbëjmë këtë bandë. Aleanca për Teatrin ka përcaktuar aksionin, ne do të jemi në mbështetje të tyre”, tha Basha.
Forca të shumta policie kanë rrethuar në orët e para të mëngjesit godinën e Teatrit Kombëtar në Tiranë. Me kalimin e orëve situata u tensionua dhe aktivistët e Aleancës për Mbrojtjen e Teatrit, aktorë, qytetarë dhe përfaqësues të opozitës janë përplasur me efektivët e policisë dhe kanë tentuar të çajnë kordonin e tyre./Opinion.al
