Shërbimi për Çështjet e Brendshme dhe Ankesat (SHÇBA) në bashkëpunim me Prokurorinë e Tiranës ka arrestuar 3 punonjës të policisë rrugore të Tiranës dhe ka pezulluar dy të tjerë për korrupsion pasiv.
Sipas informacioneve nga Drejtoria Rajonale e SHÇBA-së Tiranë, është dhënë masa arrest me burg për F.XH 58 vjeç, dhe arrest në shtëpi për A.M 25 vjeçe dhe B.A 48 vjeç. Të tre këta persona janë punonjës të policisë Tiranë. Gjithashtu Gjykatës së Shkallës së Parë Tiranë ka vendosur pezullim nga detyra për E.K 28 vjeç dhe F.D 38 vjeç, të dy banues në Tiranë dhe punonjës të policisë në kryeqytet.
Mbi këta pesë persona rëndojnë akuzat “Shpërdorimit të Detyrës” dhe “Korrupsionit pasiv nga persona që ushtrojnë funksione publike”, parashikuar nga nenet 248 dhe 259 të Kodit Penal.
Përveç punonjësve të policisë Gjykata ka dhënë masën detyrim paraqitjeje për shtetasin F.L., 35 vjeç, nga Tirana, i dyshuar për veprën penale të “Korrupsionit aktiv nga persona që ushtrojnë funksione publike”. /Opinion.al
