Grigor Tavo bëri të ditur se nuk do të jetë më president i skuadrës së Luftëtarit të Gjirokastrës. Në letrën e tij publike, Grigor Tavo sqaron arsyet e largimit duke mos e konsideruar si një braktisje por krijimin e mundësive për investitor të rinj.
“I gjendur në një situatë ku të gjithë aksionerët nuk e mbështesin Luftëtarin as në kuotat që u takon si një shoqëri aksionere, e kam të pamundur të vijoj drejtimin e skuadrës dhe shoqërisë në tërësi. Është një vendim tepër i dhimbshëm për mua dhe jo vetëm. Do të largohem nga presidenca e Luftëtarit për t’i hapur rrugë investitorëve të rinj, që ndoshta mund të bëjnë më shumë për këtë skuadër dhe këto ngjyra që secili prej nesh i ka në zemër”, shkruan ndër të tjera Tavo.
Në këtë mënyrë, në prag të fillimit të sezonit të ri, Luftëtari mbetet në mëshirë të fatit, pa president, dhe në pritje të investitorëve të rinj.
Letra e plotë e Tavos:
Te nderuar miq,
Ndiej detyrimin te komunikoj me te gjithë ju qe doni me shpirt dhe zemër Luftëtarin për te sqaruar situatën e vështirë ku gjendet ekipi ynë i zemrës. Ne katër vitet qe kam drejtuar Luftëtarin, jam krenar qe kemi arritur suksese qe edhe vete nuk i prisja. Kur fillimisht nisa te investoj për ketë skuadër, mendoja thjesht qe te ktheja Luftëtarin aty ku i takonte, ne elitën e futbollit shqiptar. E realizuam ketë qe ne vitin e pare pas shume sakrificash e vuajtjesh, dhe arritëm te festonim atë sukses. Ne tre vitet tona ne Superlige, siguruam pjesëmarrjen historike ne Kupat e Europes, por mbi te gjitha bëmë qe gjithë Shqipëria te fliste me superlativa për Luftëtarin dhe futbollin e tij.
Miq, sinqerisht qe sporti dhe veçanërisht futbolli ne kohet qe jetojmë kërkojnë shume sakrifica, mundim e investime. Ne këto katër vite edhe pse kemi një shoqëri aksionere, me disa ortake, Luftëtari është mbështetur dhe financuar vetëm nga Grigor Tavo. Nuk mund te harroj ne këtë rrugëtim edhe Bashkinë e Gjirokastrës, e cila deri tani ka përmbushur çdo obligim te sajin dhe ka plotësuar me se miri detyrimet dhe investimin qe i takon si aksioner tek K.F Luftëtari.
I gjendur ne një situate ku te gjithë aksionaret nuk e mbështesin Luftëtarin as ne kuotat qe u takon si një shoqëri aksionere, e kam te pamundur te vijoj drejtimin e skuadrës dhe shoqërisë ne tërësi. Është një vendim tepër i dhimbshëm për mua dhe jo vetëm. Do te largohem nga presidenca e Luftëtarit per ti hapur rruge investitorëve te rinj, qe ndoshta mund te bëjnë me shume për këtë skuadër dhe këto ngjyra qe secili prej nesh i ka ne zemër.
Dua qe ne këtë moment te falënderoj te gjithë bashkëpunëtorët e mi, miqte qe me kane mbështetur dhe veçanërisht tifozerine e mrekullueshme gjirokastrite, e cila na ka qëndruar pranë ne cdo hap.
Dorëheqja ime, kurrsesi nuk mund te shihet si një braktisje, por vjen për te hapur rrugën e investimeve ne skuadër per te mundësuar një ecuri sa me te mire, pasi Luftetari eshte me i rëndësishëm se cdo president apo drejtues.
Dua ta mbyll kete komunikim me premtimin qe gjithmonë do te jem tifozi numër një i Luftëtarit.
Sinqerisht,
Grigor Tavo
