Senatorja e Kalifornisë, Kamala Harris, zbuloi një plan prej 100 miliardë dollarësh për të investuar në pronësinë e shtëpive të komunitetit me ngjyrë në SHBA. Kandidatja presidenciale e 2020 tha se, nëse zgjidhet, do të vinte në lëvizje planin e saj të gjerë për të trajtuar hendekun racial të pasurisë në Amerikë.
“Pra, duhet korrigjojmë atë që kemi bërë keq dhe – pas gjeneratave të diskriminuara – t’u japim familjeve me ngjyrë një mundësi të vërtetë në pronësinë e shtëpive – historikisht një nga bazat më të fuqishme të pasurisë”, tha Harris në një fjalim të shtunën në Festivalin e Essence në New Orleans në atë që premton të jetë fillimi i një serie të politikave që fokusohen në komunitetin me ngjyrë afro-amerikan.
Sipas propozimit të Harris, blerësit e shtëpive që marrin me qira ose jetojnë në komunitetet e kufizuar me vijë të kuqe mund të aplikojnë për një subvencion federal deri në 25 mijë dollarë për të ndihmuar me pagesat ose shpenzimet e mbylljes së kredisë. Fushata e Harris vlerëson se kjo do të ndihmojë deri në 4 milionë familje.
Vija e kuqe ose “Redlining” është praktika diskriminuese e mohimit të disa shërbimeve si ato financiare për komunitetet me të ardhura të pakta dhe atyre në pakicë.
Propozimi i politikës së Harris gjithashtu synon të parandalojë diskriminimin në shitjet, qiratë dhe kreditë në shtëpi duke premtuar të forcojë dhe të zbatojë në mënyrë strikte ligjet kundër diskriminimit.
Propozimi gjithashtu do të rrisë fondet për programin e Arsimit dhe Këshillimit të Strehimit (HEC), i cili siguron njohuri financiare për pronarët e shtëpive për herë të parë.
Harris deri tani është kandidatja kryesore në radhët e Demokratëve për tu përballur me Donald Trump për Shtëpinë e Bardhë. Popullariteti i saj është në rritje pas debateve të fundit presidencialë në të cilët ajo u konsiderua fituese përballë kolegëve të partisë së saj. Kundërshtari i saj më i fortë brenda partisë mbetet ish-zëvendës presidenti Joe Biden/Opinion.al
