Gara më e madhe e qeverisë në zgjedhjet e së dielës do të jetë pjesëmarrja në votime si dhe qetësia gjatë kësaj dite. Por siç duket kërcënimet për të marrë pjesë në votime kanë filluar. Më herët ka patur denoncime se administratës iu është kërkuar me listë pjesëmarrja në votime, si dhe e familjarëve të tyre.
Ndërkohë këtë të shtunë ish-deputetja Jorida Tabaku nga selia e PD-së ka publikuar një video, teksa një i ri thotë se është kërcënuar nga kryetarja e Bashkisë së Roskovesit se do ti hiqnin kempin e motrës invalide nëse nuk do të votonin familjarisht.
https://www.facebook.com/partiademokratike/videos/696945990727888/
Nga ana tjetër nënkryetari i Partisë Demokratike, Edi Paloka, doli në një deklaratë për mediat duke akuzuar ministrin e Brendshëm, Sandër Lleshaj dhe Kryeministrin Rama se kanë dhënë urdhër për presion ndaj banorëve të Dibrës për të votuar më 30 qershor.
“Dibra është prova më e qartë e dhunës shtetërore. Policë, njerëz me maska dhe uniforma shteti, janë bërë njësh për të dhunuar dhe terrorizuar qytetarët e Dibrës për të marrë pjesë në votimet moniste. Mbrëmë ka pasur vetëm protestues paqësorë, e vetmja që ka qenë në paligjshmëri ka qenë policie që ka goditur protestuesit paqësorë”, tha Paloka.
Më tej, Paloka theksoi se dhuna shtetërore organizohet nga e njëjta bandë që ka dalë edhe në përgjimet e “Bild”./ Opinion.al
