Rreth 25 minuta ka zgjatur takimi mes Presidentit Ilir Meta dhe kreut të opozitës Lulzim Basha, në Presidencë. Basha ka mbërritur në Presidencë në orën 9:00 të kësaj të enjteje, pas ftesës së kreut të shtetit për të diskutuar për situatën politike në vend dhe mundësinë e dakordësimit të një date të re zgjedhjesh, pas anulimit të datës 30 qershor.
Kur ora shënonte 5:00 e mëngjesit Presidenti i Republikës, Ilir Meta ka mbërritur në ambientet e Presidencës. Ndërkohë nga ana tjetër Presidenti i ka bërë ftesë edhe kryeministrit Edi Rama, të cilin e pret deri në orën 13:00 me shpresën se kreu i qeverisë do të shkojë në takim. Për ftesën nuk mungoi përgjigja ironike e Ramës në Twitter, ku ai kishte publikuar dhe letrën e kabinetit të zotit Meta.
“Për shkak të fushatës elektorale që po zhvillohet sipas dekretit presidencial,ku 30 qershori është përcaktuar datë zgjedhjesh, kabineti im ka komunikuar telefonikisht pamundësinë për këtë takim. Po meqë Ilir Meta vazhdon të luajë letrash, ja dhe me shkrim: Kemi zgjedhje, jam i zënë!”
Pak më vonë, kryeministri shpërndau dhe një tjetër postim. “E meqë ra llafi tek loja e letrave të Ilir Metës, ju kam thënë pas antidekretit, se pas asaj çmendurie, pres edhe një tjetër. Se ç’kam një ndjesi që do ta bëjë, po për këtë do flasim nga e hëna e më tej, se tani kemi vetëm një punë: Zgjedhjet në 30 qershor”, shkruan Rama.
Të mërkurën, shumica e majtë në Komisionin parlamentar të Ligjeve, propozoi ngritjen e një komisioni hetimor, pjesë e procedurës që parashikohet në rastin kur kërkohet shkarkimi i Kreut të Shtetit. Javën e ardhshme, pritet të jetë parlamenti që të miratojë ngritjen e Komisionit të Posaçëm, kohëzgjatja e të cilit mund të përkojë me plotësimin e vendeve në Gjykatën Kushtetuese, e cila duhet të thotë fjalën e fundit./ Opinion.al
