Bashkia e Kuksit dhe e Matit kanë kërkuar zbatimin e dekretit të presidentit në lidhje me zgjedhjet.
Kryetari Bashkim Shehu i ka kërkuar KQZ me një shkresë zyrtare lirimin e të gjitha ambjenteve të procesit zgjedhor dhe heqjen e listave të zgjedhësve nga ambjentet e administruara nga Bashkia Kukës.
Në kërkesën e Bashkisë Kukës shkruhet:
“Në zbatim të Dekretit të Presidentit të Republikës së Shqipërisë Nr.11199, datë 10.06.2019 “Për shfuqizimin e Dekretit Nr.10298…Kërkojmë nga ana juaj lirimin e menjëhershëm të ambienteve të KZAZ Nr. 11 panë Qendrës Kulturore “Hasan Prishtina” si dhe të palestrës sportive të Shkollës së Mesme të Përgjithsme “Havzi Nela”, Kukës. Gjithashtu kërkojmë heqjen e listës përfundimtare të zgjedhësve të publikuar dhe të afishuar në institucionet arsimore parashkollore dhe parauniversitare në admistrim dhe pronësi të Bashkisë Kukës.”
Gjithashtu edhe kryetari i Bashkisë Mat, Nezir Rizvani, i ka dërguar letër KQZ në funksion të zbatimit të dekretit të presidnetit.
“Kërkoj lirimin e menjëhershëm të ambjenteve të Pallatit të Sportit “Ferit Hysa”, Burrel. Komisioni i Zonës së Administrimit të Zgjedhjeve Nr 16, të ndërpresë të gjitha veprimet për afishimin e listave të zgjedhësve në të gjitha ambjentet e shkollave të cilat janë në pronësi të Bashkisë Mat” shkruhet në kërkesën e Bashkisë Mat.
Kjo shënon veprimin e parë të ndërmarrë në zbatim të dekretit të Presidentit Meta në lidhje me anulimin e datës 30 qershor për zgjedhjet vendore. /Opinion.al
