Departamenti amerikan i Thesarit ka njoftuar për vendosjen e sanksioneve të reja kundër kompanisë gjigante të naftës në Iran, Ndërmarrja e Industrisë Petrokimike, në kuadër të masave të marra për t’i bërë presion Teheranit, që të negociojë një marrëveshje të re, që kufizon zhvillimin e raketave bërthamore dhe ato balistike.
Sanksionet e reja godasin kompaninë kryesore të naftës dhe 39 bashkëpunëtorë të huaj. Kjo kompani njihet për 40 për qind të prodhimit të naftës dhe lëndëve kimike, dhe për rreth 50 për qind të eksportit të këtyre produkteve.
Departamenti amerikan i Thesarit ka thënë se kjo kompani ka ofruar ndihmë për një kompani të kontrolluar nga Garda Revolucionare e Iranit, e cila javë më parë është shtuar në listën e “organizatave të huaja terroriste”.
Tensionet mes Iranit dhe SHBA-së janë rritur ndjeshëm prej vitit 2018, kur administrata e presidentit amerikan, Donald Trump është tërhequr nga marrëveshja bërthamore e vitit 2015, që Teherani ka nënshkruar me fuqitë botërore.
Sipas marrëveshjes, Iranit i është siguruar lirimi nga sanksionet në këmbim të frenimit të aktivitetit bërthamor. Trump ka thënë se marrëveshja ka pasur “shumë mangësi” sepse nuk ka përfshirë programin balistik të Teheranit dhe sponsorimin e terrorizmit./Opinion.al
