Këngëtarja me origjinë shqiptare Rita Ora ka arritur një karrierë ndërkombëtare mjaft të suksesshme. Mirëpo siç për çdo njeri fillimet duket se nuk kanë qenë ndër më të mirat për këngëtaret.
Në intervistën e fundit që Ora ka dhënë për “Cosmopolitan” ka treguar pikërisht për hapat e saj të parë si dhe për albumin e saj të dytë “Phoenix”.
Ka qenë vetëm 16 vjeç kur ka nënshkruar kontratën e parë me një studio muzikore dhe ndihej sikur do të ‘pushtonte botën’, megjithatë e gjithë kjo ‘ëndërr’ nuk i zgjati shumë. Producentët ishin skeptik për shkak të moshës së Ritës.
“Ata më pyetën se pse nuk po i këndoja asnjë këngë pop. Pas skenave, kishte shumë probleme politike, të cilat unë nuk i dija që ekzistonin dhe që ma bënë shumë të vështirë të isha vetvetja dhe të luftoja për muzikën që doja të bëja. Kam bërë albume të cilat ju nuk i keni dëgjuar kurrë dhe me siguri nuk do ti dëgjoni. Kjo sepse në disa momente dhe kohë të ndryshme, njerëzit me të cilët punoja më thonin: Kjo nuk është e mirë, kjo nuk është mjaftueshëm, kjo nuk do të ecë.”
Por këngëtarja vijon tregimin e saj duke theksuar se nuk është demoralizuar për asnjë çast dhe ka vijuar rrugën e saj për t’u bërë ajo që është sot.
“Bëra çfarë ishte e mundur që të gjithë të më shihnin, i thoja atyre: Nuk keni për të më hequr qafe, nuk do ta keni të lehtë. Arrita që ti bëja të kuptonin se nuk do të hiqja dorë nga ëndrra ime,’-theksoi ajo.
Gjatë kësaj interviste Rita më pas u ndal edhe tek albumi i saj i dytë i publikuar në 2018-n “Phoenix”.
“Isha shumë krenare për “Phoenix”, nuk kam qenë ndonjëherë kaq krenare për diçka që kam bërë, dhe kjo falë udhëtimit që kam përshkruar për të arritur deri tek ky projekt.”-përfundon këngëtarja me origjinë shqiptare./Opinion.al/
