Një 46-vjeçar është arrestuar ditën e sotme në Mallakastër, pasi ishte shpallur në kërkim për trafikim të lëndëve narkotike.
I arrestuari Qamil Muçaj një vit më parë ishte dënuar nga Gjykata e Krimeve të Rënda në Tiranë me 7 vite e 4 muaj burg. Në shkurt të vitit 2017 kaloi drejt Greqisë rreth 1.1 ton kanabis me anë të një kamioni.
Muçaj, sapo kishte kaluar në Doganën dhe Pikën e Kalimit Kufitar shqiptar , pati probleme te pika kufitare greke, ku u zbulua sasia e lëndës narkotike.
Pas i ka konstatuar se u gjet lënda narkotike, 46-vjeçari ka braktisur mjetin dhe është larguar, duke i shpëtuar forcave të policisë.
Njoftimi i policisë:
Vijon zbatimi i planit të masave për kapjen e personave të shpallur në kërkim.
Kapet dhe ndalohet një shtetas për “Trafikim të lëndëve narkotike” i dënuar me 7 vite e 4 muaj burg.
Nga shërbimet e Komisariatit të Policisë Mallakastër, në bashkëpunim me Seksionin për Hetimin e Narkotikëve në DVP Fier, si rezultat i një pune të mirëorganizuar dhe në bazë të informacioneve të marra në rrugë operative, u bë lokalizimi, kapja dhe ndalimi i shtetasit të shpallur në kërkim:
Q.M, 46 vjeç, banues në Mallakastër.
Ndalimi i këtij shtetasi u bë pasi Gjykata e Shkallës së Parë për Krime të Rënda Tiranë me Vendimin e datës 21.05.2018, e ka dënuar me 7 vjet e 4 muaj burg për veprën penale “Trafikim të lëndëve narkotike”.
Materialet i kaluan Prokurorisë Pranë Gjykatës së Shkallës së Parë për Krime të Rënda Tiranë për veprime të mëtejshme proceduriale.
