Ministri i Mbrojtjes në Turqi, Hulusi Akar, ka thënë se Ankaraja është duke u përgatitur nëse Shtetet e Bashkuara do të vendosin sanksione ndaj këtij shteti, për shkak të blerjes së sistemeve ruse, S-400.
Megjithatë ai ka përmendur edhe atë që e ka cilësuar si rritje të “kompromisit” me Uashingtonin për këtë çështje. Shtetet e Bashkuara i kanë kërkuar Ankarasë që të anulojë blerjen e sistemeve ruse për mbrojtje, ndërsa aleatët e NATO-s po ashtu kanë shprehur shqetësimet e tyre.
Uashingtoni ka paralajmëruar Ankaranë se do të vendosë sanksione financiare nëse Turqia vazhdon procesin e blerjes. Duke folur para gazetarëve ministri turk, Akar ka thënë se gjatë bisedimeve të fundit me Uashingtonin, Ankaraja ka vërejtur mundësi të “kompromisit” për këtë çështje.
Ai ka thënë se Turqia është “duke u përgatitur” dhe duke “konsideruar të gjitha mundësitë”, në rast se SHBA-ja nis sanksione. Akar po ashtu ka thënë se personeli ushtarak turk ka nisur trajnimet për përdorimin e sistemeve ruse.
Uashingtoni ka thënë se do të tërheqë ofertën për t’i shitur Ankarasë sistemet e ngjashme amerikane, Patriot./ Opinion.al
