Kryetari i Partisë Demokratike Lulzim Basha, është shprehur i vendosur se zgjedhjet e 30 qershorit nuk do të zhvillohen pa largimin e kryeministrit Edi Rama.
Ndërkohë, ai i është përgjigjur kryeministrit, i cili e quan kryedemokratin “miku im”, Basha tha se ai nuk është miku u tij, Rama ka zgjedhur për miq personat që kanë lidhje me krimin.
Basha tha se Rama s’mund të jetë kujdestar i një procesi zgjedhor të lirë pasi është kapur nga prokuroria duke vjedhur tre palë zgjedhje.
“Nuk kam qenë asnjëherë miku i Edi Ramës. Edi Rama i ka zgjedhur miqtë e tij, disa janë kriminelë të dënuar, disa oligarkë, disa pronarë mediash, disa shfaqin miqësinë hapur, marrin favore ditën dhe natën. Por kjo nuk është beteja ime personale.
Përballjen me njëri-tjetrin e kam fituar me të. Nuk jam nisur të përballem me të. Rama nuk mund të jetë kujdestar i një procesi zgjedhor pasi është kapur nga prokuroria duke vjedhur tre palë zgjedhje. Përdhunuesi serial i zgjedhjeve nuk mund të jetë kujdestar i zgjedhjeve të ardhshme.
Edhe socialisti më i thekur 24 karat, do thoshte çfarë të dha, si të bleu. Asnjë shqiptar nuk beson më se do ketë zgjedhje me Edi Ramën. Nuk ka njeri që e beson se me Edi Ramën mund të ketë proces të lirë zgjedhor. Me gjithë këto skandale në Europë Rama jo vetëm që nuk do ishte kryeministër por do ishte para drejtësisë, i dënuar. Opozita nuk po kërkon pushtet në tavolinë, kjo është arsyeja pse kemi paraqitur zgjedhjen më të drejtë. Me Ramën kryeministër nuk ka dhe s’do ketë asnjë proces politik e zgjedhor. Largimi i tij i hap rrugën një procesi politik.
PD dhe opozita mbeten të gatshme dhe mirëpresin çdo angazhim të faktorit ndërkombëtar për të zgjidhur këtë krizë të thellë”, deklaroi Basha./ Opinion.al E.Xh.
