Ish-deputeti i Partisë Demokratike, Ervin Salianji u paraqit sot në Gjykatën Penale për padinë e ngritur ndaj tij në lidhje me “fabrikimin e çështjes Babale”.
Sipas Salianjit e gjithë kjo çështje bëhet me qëllim që të zhvendoset vëmendja e qytetarëve nga protesta e opozitës.
“Jam këtu për respektin tuaj dhe për publikun. Qytetarët janë lodhur nga një drejtësi që nuk bën drejtësi por bën padrejtësi. Qeveria ka disa njerëz që i paguan me taksat e qytetarëve dhe këta janë edhe prokurorë, për të zhvendosur vëmendjen” tha Salianji.
“Unë do e ndjek çështjen nëpërmjet avokatëve dhe do vij kur të pranohet dëshmia e Ramës, Ballës, Xhafës dhe të gjithë personave të tjerë të përfshirë në këtë çështje, dhe do bëj kallëzim penal për drejtuesit e Policisë së Shtetit që janë përfshirë në falsifikimin e kësaj dosje”, theksoi më tej ai.
Rreth një muaj më parë, shkoi për gjykim dosja “Babalja” me të pandehur ish-deputetin, Ervin Salianji, Fredi Alizoti, Albert Veliu dhe Jetmir Olldashi për akuzën e “kallëzimit të rreme”
Në seancën e parë Fredi Alizoti kërkoi gjykim të shkurtuar, ndërkohë tre të tjerët kërkuan pushimin e çështjes./ Opinion.al
