Nga takimi me strukturat dhe simpatizantët e Partisë Demokratike në Kavajë, Lulzim Basha ka thënë se Europa e ka dëgjuar zërin e opozitës. Basha shtoi se PD ka mbështetjen e Londrës dhe Berlinit.
“Mesazhet e Evropës kurrë nuk janë dëgjuar më të qarta e më të prera. Ka folur Londra, Berlini, zgjedhje demokratike pa opozitën nuk ka, zgjedhje pa Partinë Demokratike nuk do të ketë as sot, as me 30 qershor, as mot. Ta harrojë klika kriminale. Aq sa bëri zgjedhje pa PD në Kavajë, aq do bëjë më 30 qershor”, tha Basha. Ky qëndrim i tij vjen dy ditë pasi Federica Mogherini në Tiranë i bëri thirrje opozitës që të mos cenojë proceset demokratike duke mos marrë pjesë në zgjedhjet lokale.
Më tej, Lulzim Basha në Kavajë përsëriti se opozita nuk do të lejojë zgjedhje farsë, duke bllokuar qendrat e votimit.
“Ne nuk do lejojmë në asnjë qendër votimi, lagje a fshat, një tjetër proces fals zgjedhor, ku në vend që të diktojë sovrani, krimi dhe kriminelët e Edi Ramës t’i detyrojnë shqiptarët të qeverisjen përsëri nga përdhunuesit dhe trafikantët e vajzave, t’i detyrojë të qeverisen nga trafikantët e drogës. Jo. Kjo ditë ka përfunduar njëherë e mirë për Kavajën dhe për Shqipërinë”, tha Basha./Opinion.al
