Izraeli ka filluar 24 orëshin që shënon Ditën e Përkujtimit të Holokaustit, duke nderuar 6 milion hebrenjtë e vrarë nga nazistët gjatë Luftës së Dytë Botërore.
Nderimi i tyre filloi në perëndim të diellit më 1 maj, me ceremoninë kryesore të përkujtimit në Qendrën Ndërkombëtare për Perkujtimin e Holokaustit “Yad Vashem” në Jerusalem.
Përkujtimet e këtij viti organizohen pas sulmeve fetare në rritje në mbarë botën, duke përfshirë edhe të shtënat në një sinagogë në Kaliforni më 27 prill, ku u vra një person dhe u plagosën tre të tjerë.
Kryeministri i Izraelit, Benjamin Netanyahu, ka thënë se të shtënat në sinagogën e Kalifornisë na sjellin sërish në vëmendje rritjen e antisemitizmit, ndërsa presidenti Reuven Rivlin, foli me tone më të ashpra duke paralajmëruar për rritjen e antisemitizmit në Evropë, teksa deklaroi se antisemitizmi po ngre krye duke nxitur valë emigrimi dhe urrejtje.
Në Ditën e Përkujtimit të Holokaustit në Izrael kafenetë, restorantet dhe qendrat tregtare janë të mbyllura ndërsa stacionet radio-televizive transmetojnë dokumentarë për HolokaustiN dhe intervista me të mbijetuarit.
Holokausti është një nga “pjesët më famëkeqe” të historisë, pasi shënon vrasjen masive e rreth 6 milionë hebrenjëve, vrasje të organizuara nga partia naziste e liderit gjerman, Adolf Hitler, nga viti 1933 deri më 1945. Gati 7 nga çdo 10 hebrenj që ka jetuar në Evropë është vrarë gjatë kësaj kohe./Opinion.al
