Teksa opozita ka marrë vendimin për mos futjen e saj në zgjedhjet lokale më 30 qershor, kryeministri Edi Rama ka vijuar organizimin e kandidatëve të Partisë Socialiste.
Mësohet se emrat e kandidatëve socialistë për kryetar bashkie do të zbulohen në Asamblenë e Partisë Socialiste, e cila do të mbahet më 10 maj.
Ndërkohë, në listën e kandidatëve për zgjedhjet lokale do jenë dhe emrat e disa deputetëve të PS, të cilët do të bëjnë dorëzimin e mandatit të tyre më 13 maj, kohë e cila përcaktohet në kuadrin ligjor.
Kryeministri Edi Rama gjatë mbledhje së zhvilluar sot me grupi parlamentar të Partisë Socialiste, u ka bërë thirrje krerëve të qarqeve që të përzgjedhin kandidatët më të mirë për kryetar bashkie.
Po ashtu, Rama ka vënë kushtin që kandidatët për këshilltarë bashkiakë të mos jenë të afërm të kandidatit për kreun e bashkisë.
Partia Socilaiste deri më tani ka konfirmuar zyrtarisht kandidatët Erion Veliaj në Tiranë, Sotiraq Filo në Korçë, Dritan Leli në Vlorë, Armando Subashi në Fier, Pjerin Ndreu në Lezhë dhe Majlinda Bufi në Roskovec janë konfirmuar që në Kongresin e Partisë Socialiste.
Më tej, Rama ka konfirmuar Safet Gjicin në Kukës, Fredi Kokoneshi në Divjakë, Arif Tafani në Belsh, Tërmet Peçi në Tepelenë, Ndrec Dedaj në Mirditë, Kastriot Gurra në Librazhd, Ervin Demo në Berat dhe Tonin Marinaj në Malësinë e Madhe.
Dy prefektët e Shkodrës dhe Elbasanit, përkatësisht Gledian Llatja dhe Valdrin Pjetri do të kandidojnë gjithashtu për bashkitë.
Gjithashtu pritet që Rakip Suli të lërë mandatin për të kandiduar në Kamëz, Ilir Xhangolli në Pogradec, Flamur Golemi në Gjirokastër dhe Nuri Belba në Përrenjas./ Opinion.al E.Xh.
