Kryeministri Edi Rama ka reaguar në Twitter pas zyrtarizmit të marrëveshjes mes Partisë Demokratike dhe partive të tjera opozitare. Ai e ka quajtur këtë një tjetër vetëvrasje politike, ndërsa ka thënë se zgjedhjet lokale as nuk do të ndalen dhe as nuk do të shtyhen.
“Pas djegies së mandateve, koalicioni kundër zgjedhjeve një tjetër formë e padëgjuar vetëvrasjeje politike! Humbësit kronikë janë peng i dëshpërimit të tyre, po Shqipërinë s’e marrin dot peng.Zgjedhjet as ndalen as shtyhen. Në 30 qershor qytetarët do flasin me votë në çdo bashki”, shkruan Rama.
Partia Demokratike nënshkroi marrëveshjen me aleatët e saj LSI, PR, PDK, PAA, LZHK, PDIU dhe PBDNJ, ku ndër të tjera, parashikohet krijimi i një fronti të përbashkët opozitar për ndalimin e zgjedhjeve të 30 qershorit.
Lulzim Basha tha sot se hapi i panegocieshëm për opozitën është largimi i Edi Ramës dhe dënimi i krimit elektoral.
Ndërkohë, në gjykatë është regjistruar partia “Bindja Demokratike” me kryetar Astrit Patozin, e cila pritet të marrë pjesë në zgjedhjet e 30 qershorit./Opinion.al
