Grabitja e parave në aeroportin e Rinasit ka bërë që të vërë në lëvizje të gjitha strukturat dhe autoritetet e shtetit.
Ndër kohë në lidhje me ngjarjen, banorët e Tapizës kanë rrëfyer për “Abcnews” momentet kur njëri nga grabitësit Admir Murataj, është përplasur me policinë.
Një banore rrëfen se atë ditë i është dukur si luftë dhe se fillimisht pranë grabitësve ishte vetëm një furgon policie, ndërsa më vonë kanë ardhur forcat e tjera të policisë.
“Zhurmë e madhe, të shtëna automatiku herën e parë. Më pas të shtëna pistolete. Krejt nëpër tjegull andej bam-bam, u mbyllëm brenda ne s’dinim gjë. Në fund fare vetëm një fugon policie ka qenë i Rinasit, mbrapa kanë ardh forcat e tjera”.
Banorja rrëfen se shkëmbimi i zjarrit mes grabitësve dhe policisë më 9 prill, i ka kthyer ata në vitin ’97.
Lezete Muca: “Jena trishtu atë ditë, futëm kryet brenda. Edhe në kohën e armëve që u hapën depot u futëm brenda t’u u dridh t’u iu lut Zotit”.
Po ashtu, gjatë shkëmbimit të zjarrit mes policisë dhe grabitësve, plumbat kanë depërtuar dhe në banesën e 70-vjeçares, e cila ndodhej vetëm pak metra vendit ku po zhvillohej “lufta” mes policisë dhe autorëve të grabitjes.
“Në këtë grykë lumi ndodh çdo gjë, vjedhje, përleshje. Zoti na rujt. Ata komshijtë kanë qenë mu aty dëshmitarë. Kishim frikë me u afru le që s’të lejshin. Jemi tmerru, kishim frikë për kalamajtë. Mirë që i kemi kalamajtë në një shkollë private”.
Ndërsa, një banor tjetër shprehet se kjo gjendje është e rëndë. Sipas tij grabitja ka ndodhur për shkak se autorët kanë pasur bashkëpunues brenda.
Qamili: “Atje ku rri jashtë telash, ata dyshojnë dhe vjen ajo makina rreth që i kontrollon, jo me hy brenda, kjo është e habitshme”.
Në vendin ku u vra Admir Murataj janë vendosur buqeta me lule. Disa prova në vendngjarje janë të vlefshme edhe për oficerët e policisë gjyqësore.
Pas ngjarjes së 9 prillit Forcat ushtarake kanë marrë në mbrojtje aeroportin e Rinasit, ndërsa Kryeministri Edi Rama dhe disa nga ministrat e kabinetit qeveritar kanë fajësuar drejtpërdrejt koncesionarin kinez për sigurinë e dobët.
Hetimet e Prokurorisë së Krimeve të Rënda, janë shtrirë edhe në radhët e uniformave blu. Dyshohet se një ish-efektiv të jetë i implikuar në grabitjen e ndodhur ditën e martë brenda terminalit të aeroportit të Rinasit./ Opinion.al E.Xh.
