Sot është zhvilluar gjyqi për çështjen “Babale”, ku ndër të pandehurit janë edhe ish-deputeti Ervin Salianji dhe gazetari Jetmir Olldashi. Në një dalje për mediat, Lulzim Basha ka denoncuar sot këtë gjyq pasi pretendon se është farsë dhe ka paralajmëruar hapur gjyqtarin dhe prokurorët se do të japin llogari për veprimet që po bëjnë.
“Dua ta dënoj thellësisht këtë akt, dua t’i bëj të qartë gjyqtarit Kastriot Gramshi dhe dy prokurorëve, se nuk do t’ia hedhin vettingut me këtë akt që kanë ndërmarrë. Ai dhe dy prokurorët, një për një, vettingu do t’i bëhet publikisht nga Partia Demokratike, kanë premtimin tim si kryetar i opozitës sot dhe i mazhorancës nesër. T’i bëjnë llogaritë me drejtësinë e re që po vjen”, ka thënë Lulzim Basha.
Ndër të tjera, në fjalën e tij, Lulzim Basha ka thënë se Alfred Alizoti ka marrë para nga eksponentë të mazhorancës për të pranuar se ka luajtur rolin e Agron Xhafajt, vëllait të ish-ministrit Fatmir Xhafaj.
“Prokuroria as nuk ka guxuar të thërrasë e të nisë hetimet për vetë personat që janë përgjuar nga prokuroria. Edi Rama ka promovuar dy zyrtarët e policisë, si edhe ka marrë në mbrojtje gjithë të tjerët, duke nisur me Taulant Ballën, i cili sipas përgjimeve është një ndër personat e kontaktit që bind Fredi Alizotin të pranojë paratë. Sot prokurorët kanë çuar në gjyq çështjen ku të pandehur janë denoncuesit e krimit, kriminelët nuk hetohen”, është shprehur Lulzim Basha./Opinion.al
