Ish-deputeti socialit Arben Ndoka, përmes një postimi në rrjetet sociale ka reaguar në lidhje me vendimin e prokurorisë së krimeve të rënda për sekuestrimin e pronave të tij.
Ndoka është i dyshuar për disa vepra penale mes te cilave “tjetërsim pronash” dhe “falsifikim dokumentesh”, ndërsa Cuko për “korrupsion”.
Ish-deputeti socialit shkruan në reagimin e tij se ai nuk ka asnjë pronë në emër të tij dhe se asnjë vendim për tjetërsim pronash nuk mban firmën e tij.
Ai shprehet se akuzat ndaj tij janë ngritur që pas angazhimit të tij në politik, dhe se nuk kanë asnjë bazë ligjire të cilat mund të vërtetojnë implikimin e tij në afera korruptive.
LEXO EDHE: Krimet e Rënda sekuestrojnë pasurinë e ish-deputetit
“Shpesh here viteve te fundit qe pas angazhimit tim ne politike , akuzat ndaj meje hiperbolizohen. Nuk e di ku jane keto prona qe me paskan konfiskuar mua, kur une nuk kam asnje meter toke askund.
Pse nuk e dokumentoni me fakte atehere meqenese me papergjegjshmerine me te madhe postoni lajme te tilla mediokre? Prokuroria mund te sekuestroje dhe detin Adriatik, por une nuk kam asnje meter toke te sekuestruar e as te pa sekuestruar. Ska shans as prokuroria, as portalet, as oficeret gjyqesor profesionist te konstatojne prona apo firma te falsifikuara qe kane te bejne me mua.Akuzat ndaj meje dhe arrestimi im dihet ku e ka bazen..”, -shkruan Ndoka.
Më herët prokuroria sekuestroi një sipërfaqe prej 300 mijë m2 tokë në bregdet dhe disa apartamente në plazhin e Shëngjinit. Sipas prokurorisë bëhet fjalë për sipërfaqe tokësore në zonën e Malit të Rrenzit, Shëngjinit, Rana e Hedhur, Laguna e Lezhës si dhe disa apartamente në plazhin e Shëngjinit.
Sipërfaqja e tokës e vënë nën sekuestro është përfituar në mënyrë të paligjshme, pasi toka ka qenë në pronësi të shtetit, por nëpërmjet dokumenteve të falsifikuara, është ndryshuar pronësia nga shtet në privat.
Kujtojmë që Ndoka u arrestua në kuadër të operacionit “Vol-vo 4” në tetor të vitit 2018, ku së bashku me të ra në pranga dhe ish-deputeti tjetër socialist Arben Cuko, i cili akuzohet për shpërdorim detyre dhe korrupsion.
Po ashtu, në janar të këtij viti Gjykata për Krimet e Renda refuzoi kërkesën për të liruar nga “arresti shtëpiak” dy ish-deputetët./ Opinion.al E.Xh.
