Në një dalje për mediat, kryetari i Partisë Demokratike Lulzim Basha ka folur rreth grabitjes së Rinasit, duke dhënë sipas tij “fakte tronditëse”. Basha përmendi ligjin e propozuar nga Fatmir Xhafaj, sipas së cilit policia duhet të shoqërojë transportimet e shumave mbi 950 milionë lekë. Gjithashtu, Basha tha se në kundërshtim me ligjin, Sandër Lleshaj është emëruar Kryetar i Këshillit të Bordit të Aviacionit Civil, kohë gjatë të cilës janë kryer dy grabitje në Rinas.
“48 orë pas ngjarjes fakte tronditëse kanë dalë në dritë. Ngjarja mund dhe duhej të ishte shmangur, nëse do të zbatohej urdhri i Ministrit të Brendshëm i gushtit 2018, që kërkon që policia të shoqërojë transferuat e shumave mbi 950 milionë lekë si edhe të identifikohen nga policia e shtetit mjetet e transportit. Asgjë nuk u bë nga këto.
Si ka mundësi, që Admir Murataj kishte gjashtë vjet që ishte arratisur nga burgu, nuk ishte kapur, por ka bërë katër grabitje në harkun e tre viteve duke sfiduar shtetin. Fakti i dytë është se Rama ka shkelur Kushtetutën, duke emëruar Sandër Lleshajn kryetar të këshillit të Autoritetit Civil. Nën drejtimin e tij, Rinasi është grabitur dy herë.
Kompania private e sigurimit merr 5 euro nga çdo qytetar që kalon në Rinas, por që nuk siguron asnjë. Firma është në pronësi të kunatit të një njeriu pranë qeverisë, Eno Bushi, i njohur për qytetarët edhe si avokati i Giorgo Reformatos, pilotit italian që u rrëzua në Divjakë me avionin me drogë”, tha Lulzim Basha.
Ai hodhi dyshime edhe mbi destinacionin e parave dhe se si kanë arritur grabitësit të largohen në këmbë me thasët e parave, duke aluduar se segmente shtetërore mund të jenë bashkëpunëtore në këtë krim. Basha u shpreh se nuk ka besim se ngjarja do të zbardhet, pasi kryeministri nuk mban përgjegjësi për asgjë që ndodh në këtë vend./Opinion.al
