Ministri i Jashtëm në detyrë Gent Cakaj, në një deklaratë për mediat, ka njoftuar masën tjetër që do të merret nga ky institucion për mbledhjen e pasaportave diplomatike. Cakaj tha se janë mbi 350 pasaporta diplomatike të jashtëligjshme në qarkullim dhe u bëri thirrje personave të cilët i disponojnë, t’i dorëzojnë sa më parë. Cakaj tha se dhënia pa kriter e pasaportave diplomatike, ka cenuar besueshmërinë e Shqipërisë në botë.
“Mbi 350 pasaporta diplomatike janë dhënë kundër ligjit. Kemi dyfishin e pasaportave diplomatike se vendet e Bashkimit Europian. Deputetë që kanë kaluar legjislaturat, gjykatës që nuk kanë kaluar vettingun e të tjerë që gëzojnë status të veçantë diplomatik. I bëj thirrje të gjithëve të dorëzojnë pasaportën diplomatike, sepse do të bllokohen dhe nuk do të jenë më të vlefshme. Kjo është diçka që ka zgjatur për më shumë se 20 vite, gjë që ka cenuar besueshmërinë e pasaportave diplomatike shqiptare. E si mund të flasim pastaj për liberalizimin e pasaportave të zakonshme? Shqipëria është një vend më prestigjioz se kaq. Unë do t’i përcjell qeverisë VKM-në për të marrë pasaportat nga drejtuesit e enteve, të bordeve e deri te shoferëve”, ka thënë Cakaj në deklaratën për mediat./Opinion.al
