Në gusht të vitit që lamë pas tenori i njohur Gaqo Çako u nda nga jeta. Në një rrëfim të ndjerë për të, djali i tij kantautori Pirro Çako u shpreh në emisionin ‘Rudina’ në Tv Klan rreth çasteve të tij të fundit. Sipas Pirros, i ati e ka quajtur vonë me statusin e kompozitorit të birin.
“Shumë vonë ka pranuar që unë të quhesha kompozitor, në një moment vonë ma shprehu se kisha bërë diçka. Nuk ma jepte atë vendin që më takonte, ma dha dhe kuptova se ishte më mirë vonë sesa kurrë”,-u shpreh ai.
Gjithashtu ai theksoi se ndarja nga jeta e të atit ka lënë një boshllëk të madh për të, që e vuan akoma. Sipas tij tashmë ka humbur trekëndëshi i familjes së tyre.
“ Vijoj të vajtoj, ishte një artist i madh por nuk ka si mamaja dhe si babai. Janë dy njerëzit që nuk të tradhtojnë kurrë. Më duket që ka humbur ai trekëndëshi i familjes sonë, nuk kthehet ajo gjëja që kishte krijuar natyra. Por jeta kështu është. Tani që nuk është më, kujtoj ato gjëra që më ka thënë, jetoj me filozofinë e tij, se ai ishte një njeri i heshtur, idealist, e njihte të bukurën”.
Kantautori shqiptar u shpreh se kishte mundur të realizonte të gjitha amanetet që i ati i kishte lënë. Një prej tyre ishte të vendoseshin gjatë homazheve të tij dy këngë. Një këngë të cilën ai e kishte ndryshuar si një dedikim për të birin me vargjet “Pirro ardhsh i mbarë” dhe gjithashtu një tjetër këngë që preferonte ishte “Fjalët e qiririt”.
Çako tregoi në këtë rrëfim të ndjerë se në çastet e fundit të të atit nuk ndodhej pranë tij pasi ishte duke u përgatitur për ceremoninë e varrimit. Ai ka arritur vetëm 2-3minuta përpara se artisti i njohur shqiptar të ndërronte jetë./Opinion.al/
