Komisioni i Pavarur i Kualifikimit ka konfirmuar në detyrë gjyqtaren e Gjykatës së Apelit të Krimeve të Rënda, Albana Boksi. Trupa gjyqësore që kreu hetimin administrativ të gjyqtares përbëhej nga komisioneret Pamela Qirko, Etleda Çiftja dhe Firdes Shuli.
Albana Boksi e ka filluar karrierën në Gjykatën e Rrethit Gjyqësor të Elbasanit. Me datë 1 mars 2006, ajo është emëruar gjyqtarë në Gjykatën e Apelit për Krime të Rënda në Tiranë.
Në vitin e partë të deklarimit Boksi nuk ka regjistruar pasuri. Ndërkohë në vitin 2017, pasuria e saj e deklaruar kap vlerën 11.1 milionë lekë, me një rritjeve vjetore mesatare prej 796 mijë lekë.
Kjo pasuri përbëhet nga asete të paluajtshme me vlerë 9 milionë lekë, likuiditete në bankë me vlerë 209 mijë lekë, likuiditet ‘cash’ me vlerë 350 mijë lekë dhe pasuri të luajtshme në vlerë 1.5 milionë lekë.
Pasuria e paluajtshme e gjyqtares përbëhet nga një apartament i blerë në Tiranë në vitin 2015-të dhe një tokë me sipërfaqe 1000 m2 me vlerë 2 milionë lekë në fshatin Pulë të Shkodrës, e blerë në vitin 2005 dhe ku gjyqtarja është ¼ pronare./Opinion.al
