Reperi amerikan Nipsey Hussle është vrarë ditën e diel me armë zjarri jashtë dyqanit të tij të veshjeve në Los Angeles, SHBA. Gjithashtu gjatë të shtënave janë plagosur edhe dy persona të tjerë që ishin bashkë me të.
Policia amerikane ka thënë se nuk ka ende asnjë të dyshuar ndërsa hetimet po vazhdojnë. Gazetat lokale shkruajnë se një njeri është parë duke u larguar me shpejtësi nga parkimi përballë dyqanit të Nipsey Hussle, por për tani ende nuk ka informacione të tjera.
Emri i vërtetë i Nipsey Hussle ishte Davidson Asghedom dhe ishte 33 vjeç. Në moshën e adoleshencës ka qenë pjesë e një bande në Los Angeles. Në vitin 2018, albumi i tij “Victory Lap” u nominua si albumi më i mirë i këngës rep në çmimet Grammy, ndërsa në mesazhin e tij të fundit në Twitter shkruante: “Të kesh armiq të fortë është një bekim.”/Opinion.al
