Vetëm tre gjyqtarë ndodhen aktualisht në Gjykatën e Lartë. Përmes një njoftimi, ky institucion ngreh shqetësimin për ngarkesën e dosjeve, ndërkohë që trupa gjyqësore nuk është e plotë.
Gjykata e Lartë shprehet se numri dosjeve të regjistruara ka arritur rreth 31 mijë, ndërsa vendime janë marrë vetëm për 130 dosje.
Njoftimi i Gjykatës së Lartë
Në përfundim të tremujorit të parë të vitit 2019 bëjmë me dijë se, në Gjykatën e Lartë, megjithëse në përbërje vetëm me tre gjyqtarë, vazhdon shqyrtimi i dosjeve gjyqësore të regjistruara, përfshirë këtu edhe çështje të themelit.
Për shkak të situatës së krijuar me të cilën përballet sot kjo gjykatë, përparësi i është dhënë shqyrtimit të çështjeve më urgjente ma natyrë civile, administrative dhe panale. Vetëm ditën e enjte, datë 28.03.2019, trupa gjyqësore arriti të marrë vendime për rreth 130 dosje të tilla. Ndërkaq edhe këshilltarët e mbetur (aktualisht 9), vazhdojnë studimin e dosjeve dhe hartimin e relacioneve përkatëse, bazuar në Urdhrin e Brendshëm të Kryetarit të Gjykatës së Lartë.
Aktualisht numri i dosjeve të regjistruara në Gjykatën e Lartë, për periudhën e siperpërmendur, është rreth 31.000, prej të cilave 16.000 dosje civile, 10.000 dosje administrative dhe 5.000 dosje penale./ Opinion.al E.Xh.
