Deputeti i ri i Lëvizjes Socialiste për Integrim Ralf Gjoni sot ka shkuar në Parlament i shoqëruar nga dy truproja. Një javë më parë, Gjoni u sulmua me bojë të kuqe kur po dilte nga shtëpia e tij për të bërë betimin në seancën plenare.
Sulmi ndaj Gjonit u bë objekt debatesh mes mazhorancës dhe opozitës. Monika Kryemadhi akuzoi për këtë sulm Edi Ramën, me qëllim që të akuzohej opozita. Nga ana e tij, Gjoni e quajti sjellje rrugaçërie dhe tha se nuk i trembej askujt.
“Nuk frikësohem për asnjë moment për atë destabilizim që ata kërkojnë. Nuk kam frikë nga askush. Ai dhe ajo që e kanë porositur këtë lloj sjellje rrugaçërie, duhet ta dinë që unë kam ardhur këtu dhe duhet të betohem. Nuk frikësohem për asnjë moment për këtë lloj destabilizimi që ata po përpiqen të mbjellin në vendin tonë. Unë jam këtu që të përfaqësojë të gjithë ata të rinj e të reja që kanë shpresë që ky vend mund të bëhet”, tha Ralf Gjoni një javë më parë./Opinion.al
