Dita e enjte do të jetë sërish: protestë – parlament. Kuvendi me urdhër të kryetarit Gramoz Ruçi do të mblidhet paraditen e së enjtes për të diskutuar rreth rendit të ditës, pjesë e të cilit janë ndryshimet në ligjin për vettingun në polici, si dhe një ratifikim marrëveshjeje financimi. Po ashtu do të betohen dhe tre deputetët e rinj, që këtë të mërkurë morën mandatin nga KQZ.
Njëkohësisht pritet e shtata protestë radhazi e thirrur nga opozita e bashkuar, pozicionuar pikërisht përballë godinës së seancave plenare, ku prej javësh përsëritet skenari.
Ndërkohë kryedemokrati Lulzim Basha do të jetë në protestë, ndërsa ka bërë dhe një vizitë një ditore në Gjermani. Për këtë vizitë ka pak informacion, por mësohet se ka zhvilluar takim me këshilltarë të partisë së kancelares gjermane, Angela Merkel.
Nga selia e LSI, Petrit Vasili iu bëri thirrje qytetarëve të bashkohen në protestë, që sipas tij të çlirojnë vendin nga kjo qeverisje e lidhur me krimin./Opinion.al
