Kompania “Air Albania” ka marrë certifikatën e nevojshme pranë Autoritetit të Aviacionit Civil sipas ligjeve vendase dhe atyre të Bashkimit Europian. Drejtori i Përgjithshëm i Aviacionit Civil Krislen Keri, tha në një konferencë për shtyp se është miratuar pjesa e parë e stafit me 38 punonjës dhe 8 pilotë, ndërsa fluturimet pritet të nisin në mes të muajit prill.
“Fluturimet do të nisin me destinacion aeroportin e ri të Stambollit ndërkohë që kompania Air Albania ka njoftuar se është në pritje të avionit të dytë që do të ketë si synim destinacionet në aeroportet europiane. Aeroportet e tjetra janë Roma, Milano dhe Bolonja si dhe Aeroporti i Londrës” tha Keri.
Avioni i parë i “Air Albania” është regjistruar nën emërtimin A319 Za Bel në regjistrin e avionëve civilë, ndërsa mirëmbajtja e avionëve do të bëhet nga kompania “Turkish Airlines” që është edhe aksionere e “Air Albania”
Megjithëse promovimi i kompanisë shqiptare “Air Albania” dhe avionit të parë u bë në vjeshtën e vitit 2018 nga qeveria dhe personalisht nga kryeministri Edi Rama, pas shtatë muajsh fluturimet nuk kanë nisur ende./Opinion.al
