Gjykata e Tiranës vendosi arrest me burg për 3 nga 6 të ndaluarit në protestën e 21 Marsit që u zhvillua para parlamentit. Kjo masë sigurie u caktua ndaj Dorjan Protoduarit, Maringlen Doçit dhe Emiljano Mustafës. Ndërsa për Jurgen Gjikolën, Arbër Kolën dhe Bledar Dollinë u vendos masa e sigurisë “arrest shtëpie”.
Gjashtë protestuesit e arrestuar për protestën e 21 Marsit, para Parlamentit dolën këtë të diel para gjykatës për t’u njohur me masën e sigurisë. Prokuroria e Tiranës kërkoi për të gjithë ata masën “arrest me burg”.
Sipas tyre, kërkesa është e bazuar nga pamjet filmike dhe raport shërbimeve, si dhe provave të tjera të mbledhura nga grupi hetimor. Ata akuzohen për “Kundërshtimi të punonjësit të policisë së rendit publik”, “Goditje për shkak të detyrës” dhe “Prishja e qetësisë publike”.
Ndërkohë për protestën e 21 Marsit janë proceduar në gjendje të lirë dhe 17 persona të tjerë, ndërsa 6 të tjerë janë shpallur në kërkim. I proceduar penalisht është edhe Sekretari i Përgjithshëm i Partisë Demokratike, Gazmend Bardhi, si organizator i protestës.
Bardhi ka njoftuar policinë për të zhvilluar protestën para parlamentit dhe jo para institucioneve të tjera kushtetuese. Kujtojmë që protesta e 21 Marsit u zhvendos nga parlamenti për tek Drejtoria e Policisë së Tiranës për shkak të shoqërimeve të ndryshme që bëri policia gjatë zhvillimit të protestës./Opinion.al
