“Ata ish-anëtarë të Parlamentit të cilët vendosën të braktisin mandatet, hoqën dorë nga detyrimet e tyre ndaj qytetarëve shqiptarë, duhet të lejojnë ata që duan të punojnë për të ardhmen e vendit të bëjnë punën e tyre. Ne mbështesim të gjithë ata që vazhdojnë të jenë të përfshirë në procesin demokratik në Parlament, në mënyrë që Shqipëria të vazhdojë të ecë përpara, drejt anëtarësimit në Bashkimin Europian”.
Kjo thirrje e Ambasadës Amerikane në Tiranë duket se po reflekton tek kandidatët e opozitës për të zënë vendet e lëna bosh në Parlament. 3 deputet të rinj, të 3 nga radhët e LSI kanë zënë vende në karriget e opozitës këtë të enjte. Ralf Gjoni, Nimet Musai dhe Enada Koçiraj kanë bërë betimin, duke e çuar në 14 numrin e deputeteve që po zënë karriget e lëna bosh nga djegia e mandateve.
Por teksa zhvillohej protesta e opozitës dhe seanca plenare, Amra Borova dhe Arben Elezi kanë depozituar pranë KQZ formularët e dekriminalizimit. Amra Borova është kandidate nga radhët e LSI në qarkun e Shkodrës, ndërsa Arben Elezi është nga radhët e Partisë Demokratike dhe përfaqëson qarkun e Elbasanit.
Dhe “tradhtarët” vazhdojnë me emrin e Adriatik Alimadhit, i cili ka dorëzuar formularin e dekriminalizimit në KQZ duke kërkuar mandatin për qarkun e Vlorës. Liderët e opozitës kanë thënë se Parlamenti nuk është legjitim, deri sa në të nuk janë 140 deputetë. Por a mund të “mbushet”, gjasat janë PO!
Nga ana tjetër presidenti Meta e konsideron të pranueshëm zëvendësimin e deputetëve të tërhequr me emrat e kandidatëve në listat e Partisë Demokratike dhe Lëvizjes Socialiste për Integrim.
“Në vlerësimin dhe në bindjen time institucionale Kuvendi i Shqipërisë ka 82 deputetë të ligjshëm, përfshirë edhe 3 deputetët e opozitës, të cilët nuk pranuan të djegin mandatet sipas vendimit politik të partive përkatëse. Çdo numër tjetër përtej këtij, jo vetëm që thellon këtë krizë, por sigurisht që nuk ndihmon as kapërcimin e kësaj situate, pasi çdo numër tjetër është i kontestueshëm në të gjitha planet. Si në planin kushtetues, në planin ligjor, në atë procedurial dhe politik, në planin moral”, u shpreh zoti Meta duke shtuar se një veprim i tillë “as nuk e fsheh këtë krizë të thellë përfaqësimi, dhe njëkohësisht as nuk e garanton, përkundrazi e minon, çeljen e negociatave midis Shqipërisë dhe Bashkimit Europian”./Opinion.al
