Shqiptarët jo vetëm që kanë pagat më të ulëta në rajon, por kanë një fuqi blerëse më të ulët se çdo vend tjetër i Ballkanit. Sipas raportit të Bankës Botërore dhe Institutit të Vjenës për Studime Ekonomike, paga mesatare në Shqipëri është vetëm 372 euro për frymë, ndërsa një vend sipër nesh është Kosova me 511 euro për frymë. Nga ana tjetër, malazezët kanë një pagë mesatare thuajse dyfishin e shqiptarëve, me 765 euro për frymë në muaj.
Jo vetëm kaq, por Shqipëria ka edhe fuqinë blerëse më të ulët. Duke konvertuar pagat sipas Paritetit të Fuqisë Blerëse, një shqiptar mesatar blen bindshëm më pak se fqinjët e tjerë me pagën e tij. Një shqiptar i Kosovës blen 43% më shumë mallra se një shqiptar në Shqipëri.
Pariteti i Fuqisë Blerëse është një kurs këmbimi imagjinar që përdoret për të barazuar vlerën e një monedhe me fuqinë blerëse të një monedhe tjetër, me synimin e kuptimin e nivelit real ekonomik në propocion me mallrat që mund të blihen. Është një tregues shumë i rëndësishëm, që përdoret për krahasime ndërkombëtare të nivelit të jetesës./Opinion.al
