Kreu i OSBE-së në Tiranë, Bernd Borchardt ka thënë se Shqipëria ka ngecur në miratimin e reformës zgjedhore, një ndër kushtet për anëtarësimin në Bashkimin Europian. Në një tryezë për zbatimin e dekriminalizimit, ku të pranishëm ishin edhe kryeprokurorja Arta Marku dhe kreu i KQZ-së Klement Zguri, Borchardt u ndal veçanërisht në aktualitetin politik.
“Jemi shumë pranë zgjedhjeve të qershorit, por Shqipëria po kalon një moment kritik. Për fat të keq ndryshimet e kërkuara dhe reforma zgjedhore nuk është votuar, ka ngecur në Kuvend”, tha kreu i OSBE-së. Ai shtoi se reforma zgjedhore kërkon 84 vota dhe se votimi i deputetëve të rinj që janë futur apo do të futen në Parlament, është i ligjshëm.
“Reforma elekotrale kërkon 84 vota. Nuk e di nëse ata që janë futur në Parlament janë në favor të saj ose jo. Por votimi është i ligjshëm nga pikëpamja juridike. Politikisht është votuar me shumicë. Dhe ne rekomandojmë dialogun për këtë”, tha Borchardt.
Gjatë fjalës së tij, ai shtoi se akuzat politike dhe akuzat për shitblerje votash duhet të marrin përgjigje konkrete, pasi po minohet besimi i popullit. “Akuzat politike për integritetin e shtetit minojnë besimin e publikut. Siç theksohet në raportin e fundit të ODIHR, autoritetet duhet t’i japin përgjigje akuzave për shitblerje votash pasi është vënë në rrezik besimi i publikut”, u shpreh Borchardt./Opinion.al
