Kryeministri italian,Giuseppe Conte, ka deklaruar nga Beogradi se Prishtina duhet të tërheqë mbrapsht tarifën doganore ndaj Serbisë dhe ti hapë rrugë vazhdimit të dialogut me Serbinë.
Gjatë konferencës së përbashkët me Presidentin serb Aleksandër Vuçiç, Conte konfirmoi mbështetjen e Italisë ndaj Serbisë në rrugën e saj evropiane dhe theksoi se mbështet të gjitha përpjekjet e bëra nga kreu i shtetit të Serbisë, Aleksandër Vuçiç, në përmbushjen e këtij qëllimi, si dhe në përpjekjet për të arritur një kompromis me Prishtinën.
Sipas Giuseppe Contes, “masat e marra nga Prishtina nuk çojnë askund dhe se dialogu është e vetmja mënyrë për të hapur rrugën drejt BE-së”.
Për këtë rast, tha Conte, reagimi i qeverisë serbe ndaj masave të Prishtinës ishte shumë i mençur.
I pyetur nga gazetarët sesi e sheh Italia politikën aktuale të Prishtinës, e cila nuk është gati për ndonjë lëshim drejt Beogradit dhe bashkësisë ndërkombëtare, Conte tha:
“E përsëris, sipas mendimit tim, nismat e njëanshme të iniciuara nga Kosova nuk çojnë në asgjë.Masa e tyre, procedura nuk çon në asgjë. Mendoj se e vetmja mënyrë për të shpejtuar rrugën drejt BE-së është dialogu.Të gjitha palët duhet të jenë të mençura. E theksoj edhe një herë se vendimi i mençur është bërë nga qeveria serbe në lidhje me Prishtinën”./ B.K Opinion.al
