“Palët të bëjnë hapa pas dhe të reflektojnë më përgjegjshmëri për të vendosur normalitetin politik”. Ishte kjo deklarata e presidentit Ilir Meta, kur u pyet për krizën politike.
Por për kryetarin e PD-së, Lulzim Basha opozita nuk do të bëjë asnjë hap pas. Ai tha se për një qeveri të kapur nga krimi i organizuar do të ketë vetëm hapa para, duke bërë sërish thirrje për protestë.
“Nuk kam ndërmend të komentoj asnjë deklaratë të presidentit Meta, por mund t’ju them se në përballjen me krimin e organizuar dhe një qeverie të kapur në bashkëpunim me krimin e organizuar për të vjedhur zgjedhjet dhe për të vjedhur paratë e shqiptarëve , nuk ka për të pasur ansjë hap pas. Ka për të patur vetëm hapa përpara se vetëm hapat përpara, largimi një orë e më parë i Edi Ramës dhe një qeveri e palidhur me krimin e organizuar, që mundëson zgjedhje të lira e të ndershme, do t’u japë shqiptarëve atë që meritojnë: një parlament dhe qeveri prodhim i votës dhe vullnetit të tyre dhe jo prodhim i niçeve, i bajrave, i shullazëve me shokë. Në raport me këtë çështje, asnjë hap pas, por vetëm hapa përpara, duke nisur nesër me bashkimin e qytetarëve në protest para Asamblesë së dalë nga vota e krimit dhe jo nga vota e qytetarëve. Nesër në oren 10.00 i bëj thirrje të gjithë qytetarëve të mi të jemi të gjithë bashkë, sepse kjo është një betejë që na bashkon dhe nuk na ndan, është një betejë që nuk bëhet për pushtet, nuk bëhet për një parti politike. Bëhet për ta çliruar vendin nga zgjedha e krimit“, tha Basha, pas një takimi me presidentin slloven.
Nga qeveria dy ministra kanë hedhur idenë për një tryezë dialogu mes palëve, që ta drejtojë Presidenti Meta. Për Lëvizjen Socialiste për Integrim, Ilir Meta negociator është pranuar. Por kryedemokrati Lulzim Basha ka hedhur poshtë kategorikisht një takim me Edi Ramën, ndërsa ky i fundit nga samiti i Diasporës e pyeti: Kur do flasim? / Opinion.al
