Pas daljes nga Prokuroria e Krimeve të Rënda, ku u njoh me akuzat që rëndojnë mbi të, Saimir Tahiri foli shkurtimisht për gazetarët.
Ai u pyet nëse si ish-ministër i Brendshëm ka materiale komprometuese për zyrtarë të lartë të vendit dhe me ato bën shantazh. Tahiri u përgjigj se: “Këtij vendi kaq të vogël i mjafton Baba Taku me çantën e zezë, nuk ka vend edhe për Saimir Tahirin. Unë kam vetëm të vërtetën time.”
Gazetarët gjithashtu e pyetën se a ka mbështetjen e kryeministrit Rama, i cili kohët e fundit ka përcjellë mesazhe për t’i kërkuar falje, Tahiri ka thënë: “Nuk më duhet fare. Nuk më duhet mbështetja e askujt, më duhet vetëm e vërteta ime. Nëse nuk e kuptoni se sa e rëndësishme është e vërteta për një njeri, nëse mendoni se për të vërtetën duhet mbështetja e dikujt, mbështetja politike e dikujt, e keni gabim. Unë ia dal edhe pa këto dhe do t’ia dal.”/Opinion.al
