Seanca plenare e radhës do të mbahet ditën e martë, në 5 mars. Ky është vendimi i marrë nga Konferenca e Kryetarëve. Opozita njoftoi anulimin e protestës të së enjtes para Parlamentit për shkak të moszhvillimit të seancës parlamentare. Kështu që rrjedhimisht opozita do të protestojë në 5 mars. Ndërkohë mbetet e pandryshueshme protesta e 16 Marsit, përpara Kryeministrisë nga opozita.
“Kuvendi ka caktuar paraprakisht që seanca plenare e radhës të jetë më 5 Mars 2019 (e martë), por pa specifikuar orën. Për këtë arsye, masat për protestën e radhës të jenë për datën 5 Mars. Porositë janë të njëjta si për protestën që kishim planifikuar për në datën 28 dhe që e anuluam. Për orën e protestës jemi në varësi të orës së seancës”, thuhet në njoftimin e opozitës.
Ndërkohë pas takimit me drejtuesit e opozitës dhe me ministrin e Brendshëm, Sandër Lleshaj, takime që u zhvilluan në zyrat e delegacionit të BE në Tiranë, grupi i eurodeputetëve ka shkuar në Kryeministri. Për rreth një orë ata kanë zhvilluar një takim me kryeministrin Edi Rama, ku siç ishte njoftuar në axhendë, ka qenë i pranishëm dhe ministri në detyrë për Evropën dhe Punët e jashtme, Gent Cakaj.
Nuk ka ende asnjë njoftim zyrtar mbi këtë takim, por besohet se situata e krijuar në politikën shqiptare pas dorëzimit të mandateve nga deputetët opozitarë dhe fillimi i protestave nga opozita kanë qenë në fokus të diskutimeve.
Nesër në orën 10.15 do të ketë një konferencë shtypi nga delegacioni i Parlamentit Europian që ka mbërritur në Tiranë, gati tri javë para publikimit të progres-raportit të Komisionit Europian për Shqipërinë. /G.F Opinion.al
