Blerta Koçiasi është nënë e dy fëmijëve, Elenës dhe Ersit. Në emisionin “E Diela Shqiptare” në rubrikën “Ka Një Mesazh Për Ty”, ajo kishte një mesazh, por edhe një premtim për fëmijët e saj.
Teksa tregon historinë e saj, Blerta pohon se në moshën 19 vjeçare vendosi të largohet nga prindërit dhe vëllezërit. Edhe pse nuk e kishte aprovimin e familjes, Blerta mori iniciativën të largohej me ish-burrin e saj dhe të formonte një familje.
“Vendosëm bashkë që unë të largohesha dhe u largova. Më rrëmbeu më saktë. U largova dhe nga ai moment filloi jeta ime. Për një vit e gjysmë nuk kam folur me prindërit dhe vëllezërit. Ka qenë një katastrofë e vërtetë, edhe pse unë në atë një vit e gjysmë ngela shtatzënë me gocën. Edhe pse nisi jeta e re ishte e vështirë për mua. Fat ishte martesa e vëllait të madh, për të shkuar tek prindërit dhe të bashkohesha me ata, sepse vëllai tha nëse nuk vjen motra unë nuk bëj dasmë. Për mua ishte shumë e rëndësishme.”
Pas kësaj martese Blerta u bë nëna e dy fëmijëve për të cilët thotë se “janë forca që unë eci përpara dhe jetoj”. Ajo dëshironte që fëmijët të shkolloheshin ndaj edhe vendosi të divorcohej pasi jetonte në një fshat të Korçës ku i duhej të dërgonte fëmijët me kalë në shkollë.
“Kur unë jam ndarë, goca ka qenë 8 e gjysmë dhe çuni 6 e gjysmë. Çuni fillonte klasën e parë dhe goca në klasën e dytë. Ishte shumë e vështirë, largësia për të shkolluar fëmijët ka qenë një katastrofë. E çoja gocën me kalë dhe e merrja me kalë nga shkolla, sepse ishte 50 minuta larg nga autobusi. Në këmbë ishte e vogël, jetonin në një fshat të Korçës. Nga aty merrte autobusin dhe vazhdonte rrugën për në shkollë. Kthehej me autobus dhe dilja ta merrja me kalë.
Erdhi mosha që do shkonte në shkollë djali, gocën e kam futur 1 vit me vonesë. Vendosa të divorcohem, nuk ishte për shkak të grindjeve, por edhe për shkak të shkollimit. Unë vendosa të divorcohem, për një mundësi më të mirë për fëmijët. Kam shkuar tek babai im, sepse shkollën e kisha shumë afër. Nuk kisha mundësi tjetër. Bashkëshorti nuk donte, ai donte të rrinte aty ku ishim, e kishte të vështirë të largoheshim. Edhe pse kisha grindje në familje, mund t’i tejkaloja” tha ajo.
Blerta u kërkoi fëmijëve të saj të hiqnin dorë nga telefoni e të fokusoheshin te mësimet. Ndërsa Elena, e bija, i premtoi në studio që do përpiqej të mësonte më shumë, edhe pse e pranoi që është e tërhequr nga telefoni dhe rrjetet sociale.
Përpos mesazhit, Blerta i premtoi Elenës dhe Ersit se duke filluar nga sot, do të jetë më shumë prezente në jetën e tyre dhe do të mundohet t’i kompensojë orët e shumta që ka humbur në punë./E.M
