Pushtet të tavolinë nuk ka! Zëdhënësja e qeverisë, Elisa Spiropali thotë se mazhoranca është në të drejtën e saj për të qeverisur, ndërsa sipas saj kreu demokrat Lulzim Basha ndodhet në presion edhe brenda partisë së tij, nisur edhe nga gjuha që përdor. Zonja Spiropali thotë se Basha duhet të kuptojë që pushteti nuk bie nga qielli dhe as nuk merret në tavolinë.
“Basha është në presion brenda partisë së tij, presion nga Berisha dhe elementë të tjerë për të vepruar në mënyrë radikale dhe gjuha është e papranueshme, nuk është gjuhë politike, për tërheqje zvarrë, plumb ballit, kamikazllëk dhe ajo që po bëjnë është lodhja e njerëzve. Basha duhet ta kuptojë që pushteti nuk bie nga qielli, nuk merret në tavolinë. Koha e pazareve politike ka marrë fund. Jemi legjitimë në të drejtën tonë për të qeverisur. Kërcënimet me djegie mandatesh janë të papranueshme në një vend normal”, ka thënë zëdhënësja e qeverisë.
Por kujtojmë që është po zonja Spiropali që në një intervistë tjetër tha se nuk kishte asgjë të keqe që pushteti të ndahej me opozitën. Tani cilën Elisa Spiropali të besojmë? /G.F Opinion.al
