Kryeministri Edi Rama thotë se opozita vazhdon të jetë një pengesë e madhe për rrugën e zhvillimit dhe përparimit. Gjatë fjalës së tij në Pukë në aktivitetin “Bashkia që duam”, Rama deklaroi se ata janë problemi dhe do të vazhdojnë të mos fitojnë zgjedhje deri sa të kuptojnë problemin e tyre.
“Në një rrugë që është e njohur për të gjithë, sa herë afrohen zgjedhjet ata ja fillojnë këtij avazi sepse nuk fitojnë dot. Ndërtuan një çadër në mes të bulevardit, bllokuan rrugën dher bënë çmos që të shmangnin zgjedhjet dhe t’i përdornin ato kundër reformës në drejtësi. Sot është e njëjta situatë ndërkohë që reforma në drejtësi po ecën përpara dhe po hyn në fazën e ngritjes së institucioneve. Ata përsëri i vihen barrikadë vendit dhe drejtësisë dhe përdorin argumenta që janë vetëdiskreditues për këdo që ka veshë të dëgjojë. Kujt shqiptari që di sadopak për procesin zgjedhor në Shqipëri mund t’i besohet se këta që flasin për blerje votash janë zgjidhja dhe nuk janë problemi. Nuk fitojnë dot zgjedhjet sepse vazhdojnë të jenë problemi. Sa herë afrohen zgjedhjet ata dalin nga binarët. Të gjitha janë justifikime, mënyra për t’i ikur ballafaqimit me qytetarët. Në ballafaqimin e ardhshëm zgjedhor kurdo qoftë, këto zgjedhje apo në ato të 2021, populli shqiptar do t’i lërë aty ku janë por do të zvogëlohen”, u shpreh Kryeministri Edi Rama.
Ndërkohë në Policinë e Lezhës janë shoqëruar rreth 11 persona, për tubim të pa ligjshëm dhe bllokim rruge. Ndër të shoqëruarit në komisariatin e policisë së Lezhës edhe nën Kryetarja e Bashkisë Lezhë, Alfrida Marku. Protestues i bllokuan rrugën kryeministrit në hyrje të Lezhës.
Mes tyre dhjetëra simpatizantë të PD nga Lezha, Shkodra dhe Vau i Dejës për disa orë e mbajnë të bllokuar rrugën ku duhet të kalonte kryeministri Rama, i cili ishte nisur drejt Pukës. Organizimi i kësaj proteste duket se gjeti edhe policinë e Lezhës të papërgatitur. Efektivet erdhën në vendngjarje pas grumbullimit të protestuesve./ G.F Opinion.al
