Në një dalje për mediat, deputetja demokrate Jorida Tabaku ka denoncuar aferën korruptive sipas së cilës familja e Elisa Spiropalit ka përfituar miliona lekë nga tenderat shtetërorë. Kompania e krijuar nga familjarët e Spiropalit, është kaluar nga njëri pjesëtar i familjes te tjetri, me vlera shumë të vogla shitjeje.
“Kjo kompani është krijuar në 9 shtator në të njëjtën ditë që u krijua qeveria Rama. Dokumentet zyrtare konfirmojnë se Enkli Spiropali, vëllai i zëdhënëses së qeverisë që në atë kohë po merrte emërimin si Drejtoreshë e Doganave krijoi një kompani që e quajti SLM me qendër në Fier dhe me kapital 1 milionë lekë të vjetra. Brenda pak muajve, kompania e sapokrijuar fitoi tenderin e parë në 27 mars 2014. Bamirësi ishte kunati i tij, bashkëshorti i Elisa Spiropalit. Për të fshehur gjurmët e konfliktit të interesit dhe të ndonjë vepre tjetër penale vëllai i saj e shiti kompaninë me letra në 8 prill 2014. Kompania u shit brenda familjes, tek kushëriri i bashkëshortit. Vlera e shitjes ishte 1 milionë lekë, megjithëse kompania fitoi një tender prej 6 mln lekësh”, ka thënë Tabaku.
Nga ana tjetër, skema korruptive u sqarua më gjerë nga Lealba Pelinku, e departamenit të antikorrupsionit në PD.
“Për të përfituar 550 milione lekë pa rënë në sy, familja e Spiropalit ndoqi një shkelje djallëzore. 550 milionë lekë janë marrë me tendera të vegjël, 6-7 milionësh, më bashkëshorti i Spiropalit i ka dhënë kompanisë së vëllait të Elisa Spiropalit, 350 milionë lekë. Ish-drejtoresha e Doganave, e ka blerë edhe traun e doganës nga vëllai i saj. Për të marrë tenderat duhej eksperienca, por për këtë qeveri ka rëndësi vetëm vjedhja”, tha ajo.
