Ndue Fuga, është 80-vjeçari nga fshati Fishta e Lezhës i cili u ndalua mbrëmjen e së dielës nga policia si një nga protestuesit e dhunshëm. Në protestën e së shtunës, ai kaloi kordonin e policisë dhe më pas hipi në verandën e Kryeministrisë, me një flamur në dorë. 80-vjeçari pasi kaloi disa orë në dhomat e paraburgimit të Drejtorisë së Përgjithshme të policisë së Tiranës u la i lirë.
Sot, për mediat ai tha se është i përndjekur politik dhe se ka njëmijë arsye për protestuar kunder kryeministrit Edi Rama. Ndue Fuga thotë se nuk ka frikë dhe se rezistenca e tij do të jetë e vazhdueshme deri në rrëzimin e Edi Rames.
“Kam një iniciativë të madhe për të rrëzuar PS-në. Do të vazhdoj deri sa të më dalë shpirti. Jam i vendosur t’i shkoj deri në fund deri në vdekje“, thotë i moshuari.
Edhe për ndalimin e tij pati polemika, pasi sipas nenit 230 të Kodit të Procedurës Penale, për kriteret e veçanta të masës së arrestit me burg, janë disa kategori që përjashtohen nga arrestimi nëse kanë bërë vepra penale që dënohen më pak se dhjetë vite burg.
Ndër të tjera, në pikën 2 të nenit 230, shkruhet se: “Nuk mund të vendoset arresti me burg ndaj një personi që ka kaluar moshën shtatëdhjetë vjeçare…” . Më poshtë mund ta lexoni të plotë nenin 230 të Kodit të Procedurës Penale.
