Partitë liberale dhe sovraniste do të dominojnë Parlamentin Europian pas zgjedhjeve të 26 majit. Është ky rezultati i sondazhit të parë nga Europarlamenti, me të dhënat e datës 6 shkurt. Sipas këtij sondazhi, partia italiane “Lega Nord” do të ketë një numër të konsiderueshëm deputetësh në parlament, Marine Le Pen do të marrë vota nga Macron, ndërsa FIDESZ, formacioni politik i kryeministrit hungarez Viktor Orban është shumë pranë kuotës 50%.
Në nivel kontinental, parashikohet rënia e partive tradicionale europiane, Partia Popullore Europiane dhe Partia Socialiste Europiane, të cilat për herë të parë prej vitit 1979 së bashku nuk do të kenë shumicën për të kryesuar Parlamentin Europian, ndaj e kanë të detyrueshëm koalicionin me partitë liberale.
Sondazhi parashikon se nëse sovranistët e Ministrit të Brendshëm italian Matteo Salvini do të vijojnë me të njëjtën performancë, do të arrijnë të formojnë grupin e dytë më të madh të parlamentit, duke kaluar socialistët.
Për të përfaqësuar 435 milionë qytetarët e Kontinentit të Vjetër do të zgjidhen 705 parlamentarë. Përpara Brexit, numri i tyre ishte 750. Në nivel europian, sipas këtij sondazhi, Partia Popullore Europiane do të konfirmohet si grupi i parë politik në Strasburg, megjithëse me një rënie të ndjeshme nga vitit 2014.
