Kreu i grupit parlamentar të PS-së, Taulant Balla e ka cilësuar si një turp të madh atë që ndodhi sot në sallën e Kuvendit, ku deputeti demokrat Edi Paloka hodhi bojë me anë të një shiringe ndaj Kryeministrit Rama.
Balla tha jashtë sallës së Kuvendit, se: “në seancën e ardhshme PS do të depozitojë kërkesën për shkarkimin nga posti të Edi Palokës”.
“Gjithcka u bë në një seancë solemne si është momenti i votimit të marrëveshjes për anëtarësimit në NATO të Maqedonisë së Veriut dhe në prezencën e një miku të vyer jo se është kryetari i kuvendit të Maqedonisë së Veriut por se është personalitet i rëndësishëm i shqiptarisë. Berisha ia ka marrë dorën që çadrën ta bëjë pistoletë dhe shiringën ta bëjë stilograf. Të bëhen hetimet për turpin që kreu nënkryetari i Kuvendit. Më lejoni tu them se grupi i PS nuk duron më që nënkryetari të jetë Paloka dhe në seancën e ardhshme do depozitojmë kërkesën për shkarkimin”- tha Balla.
Por Balla nuk tha asnjë fjalë për përqeshjen e vazhdueshme që Rama i ka bërë Palokës në Kuvend, duke i vënë në pah mënyrën e të folurit.
Edhe pse u pyet për gjestet e pahijshme të Ramës ndaj Palokës, Balla e kaloi me të qeshur, duke preferuar të mos japë asnjë koment.
Ndërsa më herët ish-kryeministri Berisha, e cilësoi kryeministrin Rama si një sharës të lindur.
“Kryetari i pseudo mazhorancës të fyejë kryetarin e opozitës. Merrni shifni kamerat se çfarë i tha kryetarit të opozitës. Ato fjalë ja thotë çdo shqiptar atij, por ai u lëshua me fjalë që ishin ofenduese. Nuk ka gjë më të rëndë sesa kryeministri shan në çdo moment opozitën dhe kreun e saj. Kryeministri një sharës i lindur. Këta janë gangsterë të pafytyrë”- tha Berisha./ Dl
