Pjesëmarrja e Bebe Rexhës në eventin më të rëndësishëm muzikor, Grammy, u komentua jashtmase. Kjo për faktin se këngëtarja me origjinë shqiptare foli hapur për indinjatën e saj kur stilistët e brand-eve të mëdha refuzuan ta vishnin. Në evente të tilla, është bërë e modës që këngëtarët e artistët të shoqërohen nga stilistët të cilët i veshin. Rexha, emri i vërtetë i së cilës është Bleta, u habit kur iu tha se ishte shumë e shëndoshë për t’u veshur nga shtëpitë më të famshme të modës. Në shenjë proteste këngëtarja tha se ajo do të vazhdonte t’i blinte fustanet në Amazon, siç kishte bërë gjithmonë.
Një tjetër përditësim ka ardhur nga këngëtarja në lidhje me pjesëmarrjen në Grammy. E pyetur nga reporterët, ajo ka thënë se në mbrëmjen e Grammy do ta shoqërojnë tre njerëzit më të rëndësishëm të jetës së saj.
“Do të shkoj me nënën, vëllanë dhe babain. Do t’I sjell të gjithë në tapetin e kuq. Dua që të jenë pranë meje në çdo hap.”
Kështu ka thënë këngëtarja duke shtuar se do të festojë edhe nëse nuk fiton./E.L
