Yjet e kinemasë bëhen shpesh pjesë e politikës. “Politico.eu” sjell disa shembuj të spikatur:
Steven Seagal
Ylli i filmave aksion punon për mikun e tij të mirë Vladimir Putin. Pas një karriere në rënie, Seagal nisi të merrej me muzikë bluz, pa ndonjë sukses. Ndërkohë në gusht të vitit te shkuar, aktorit iu dha një rol i ri, si “përfaqësues i posaçëm” i Moskës mbi lidhjet humanitare SHBA-Rusi.
Ministria e Jashtme Ruse, tha se misioni i Seagal do të përfshijë nxitjen e “marrëdhënieve midis Rusisë dhe Shteteve të Bashkuara në fushën humanitare, duke përfshirë bashkëpunimin në kulturë, art, shkëmbime publike dhe rinore”. Aktori, gjyshja e të cilit ka lindur në Vladivostok, u bë shtetas rus në nëntorin e vitit 2016.
Jean-Claude Van Damme
Heroi i filmave aksion, dhe i atyre me arte marciale, është një mbështetës i hapur i Donald Trumpit. “Tani për tani, ne kemi nevojë për Donald Trumpin”- u shpreh ai para zgjedhjeve presidenciale në SHBA. Por si duket simpatia është e ndërsjellë. Trump tha në një intervistë për gazetën “The New Yorker” se filmi “Bloodsport” i Van Damit, është një nga të preferuarit e tij.
Pamela Anderson
Anderson është shprehur kritike mbi Brexit, duke thënë:
”Jam e sigurt se unë mund të kisha negociuar për kushte më të mira, sesa kjo marrëveshje mjerane. Unë kam negociuar me Hollivudin për dekada, dhe unë mund të bisedoj me kryenegociatorin e BE-së zotin Mishel Barnier dhe politikën franceze.“
Ajo mbështeti gjithashtu Katalonjan, duke shkruar në një blog që “ata nuk po kërkojnë shumë, apo gjëra të tepruara”, dhe duke e përshkruar qeverinë spanjolle si ”krejtësisht idioteske”. Anderson ka shtuar se e gjithë Europa, duhet të shqetësohet nga rrëshqitja drejt një forme të re fashizmi në Itali.
Michael Caine
Jo thjesht yll i filmave aksion, por edhe fitues i dy çmimeve Oskar, Caine është një mbështetës i fortë i Brexit. Ai i tha BBC-së në tetorin e vitit të shkuar:
”Njerëzit më thonë do të jesh i varfër. Unë them se më mirë të jem një artizan i varfër i fatit tim, sesa të mbështes dikë që nuk e di nëse më bën të pasur”.
Brigitte Bardot
Ylli i kinemasë franceze, është një mbështetëse e Jelekëverdhëve, të cilët shkaktuan një përçarje të madhe në mbarë Francën, dhe e detyruan Emannuel Macron të pranonte me përulje publike, kërkesën e protestuesve për anulimin e një takse të re mbi karburantin.
Bardo është e njohur për aktivizmin publik dhe polemikat që shkakton. Ajo ka bërë komente të shumta anti-myslimane, për të cilat është dënuar nga gjykatat me gjoba të majme. Midis viteve 1997-2008, ajo është përballur 5 herë me gjyqtarët francezë, për “nxitje për urrejtjes racore”. Ajo i bëri gjithashtu thirrje njerëzve, që të votonin për Marin Le Penin, dhe kundër Makron “sy-akullit”, në zgjedhjet presidenciale.
