Piloti i avionit me të cilin udhëtonte Emiliano Sala nga Franca drejt Kardifit nuk kishte licensë për pilotim privat. Kështu bën me dije media britanike “The Sun”, sipas së cilës, 59 vjeçari David Ibotson, nuk ishte i autorizuar për të transportuar pasagjerë me pagesë. Sipas “The Sun” ai nuk figuronte i regjistruar në regjistrin federal të agjencisë së aviacionit.
Gjithashtu ekspertët e aviacionit kanë dalë në përfundimin se modeli, me të cilin ka udhëtuar argjentinasi Sala, është ndër avionët më defektozë me të dhëna të frikshme.
“Modeli Piper Malibu ose PA-46 rezulton të jetë aksidentuar më shumë se 160 herë, ndër më të shumtit deri më tani”, ka deklaruar për “The Sun”, eksperti në botën e aviacionit Alastar Rosenshein.
Aeroplani i tipit “Piper Malibu”, me futbollistin dhe pilotin ne bord, ishte nisur nga Nantes dhe do të udhëtonte drejt Cardiff, kur u zhduk mesnatën e së hënës. Para se të humbiste nga radari dhe të shkëpuste komunikimet në radio me kullën e kontrollit, avioni i vogël kishte zbritur në një lartësi 700 metra. Para se avioni të humbiste, futbollisti Sala u dërgoi një mesazh zanor shokëve të tij, të cilëve u thoshte se kishte frikë dhe se aeroplani po dridhej. Kushtet e motit në hapësirën ku avioni fluturonte ishin tejet të këqija.
Autoritetet kanë ndërprerë kërkimet dhe kanë thënë se është e pamundur që dikush të mbijetojë në ato kushte, ku era është shumë e fortë ndërsa deti është i trazuar. Megjithatë, nuk është gjetur asnjë pjesë e avionit të rrëzuar. /E.M
