Duka i Edinburgut, Princi Philip është përfshirë në një aksident rrugor. Lajmi është bërë i ditur nga Pallati Mbretëror në Britaninë e Madhe.
97-vjeçari nuk u plagos në aksident. Ai nuk ka pësuar asnjë lëndim dhe ndodhet në gjendje të mirë. Pallati Mbretëror deklaroi se në aksidentin rrugor ishte përfshirë dhe një automjet tjetër. Policia nisi hetimet për këtë rast.
Princi Philip, bashkëshorti i Mbretëreshës, është tërhequr nga jeta publike dhe nga funksionet e tij në Gusht të vitit 2017. Tërheqja e tij erdhi pas dekadave mbështetje ndaj Mbretëreshës në evente bamirësie dhe ceremoni të tjera.
Pallati Mbretëror llogariti se që nga viti 1952, Duka i Edinburgut ka kryer 22.219 angazhime publike. Në Prill të vitit të kaluar, ai iu nënshtrua një operacioni në spital që përfundoi me sukses.
